現代人健康最重要，家吓企業叫員工拼搏之餘，都要力求夥計工作身心平衡，好似發鈔行渣打，就幾有心思，佢哋上個星期，專登搞咗個「WellbeingWeek」（幸福生活周）。
佢哋除咗搵五星級酒店文華東方，入面OrientalSpa位按摩師嚟，幫員工按摩之外，仲舉辦免費瑜伽班，同埋喺員工飯堂，炮製一系列健康餐單。
渣打餐單有三文魚
渣打集團行政總裁蘇利民，仲特登畀員工喺其中一日提早放工，同家人朋友暢聚，貫徹平衡身心健康嘅理念。
一般人都覺得，健康餐單梗喺又淡又唔好食，之不過，渣打張餐單就好吸引，例如有烚三文魚龍脷卷配喬麥麵、橄欖油燒茄子配糙米飯及鮮茄蓉、燒雞胸配野米意大利黑醋汁等等，仲有低脂、低鹽等選擇。