周中進行嘅歐冠盃分組賽，不乏「例行公事」，初步睇多捧主隊應有着數；早飛推介士砵亭、燕豪芬及基輔戴拿模3瓣。
歐冠盃分組賽B組，已無出線機會嘅第3位球隊士砵亭，主場對榜尾莫斯科斯巴達時，前者只要多取1分，已可確定以第3名完成小組賽，轉戰歐協盃資格。但睇斯巴達今季歐洲賽客場表現差，同組拜仁慕尼黑今季所有賽事最大勝仗，正係歐冠盃主場對斯巴達大勝4:0所取得；斯巴達作客國米亦負1:2。今仗雖謂士砵亭有權睇定嚟食，和波都得，但有得揀梗係穩陣啲贏埋仲好，又有歐冠盃贏波獎金落袋，何樂而不「贏」？
士砵亭燕豪芬基輔全W
C組燕豪芬主場對波爾多，絕對係名正言順嘅「例行公事」。因為賽制係以對賽成績先行，呢場波無論踢出咩戰果、邊隊大炒或大敗十幾廿球，都唔會改變燕豪芬肯定以次名出線、波爾多肯定得到第3名踢歐協盃嘅事實。雖則係咁，燕豪芬話晒都叫做喺主場球迷面前獻技，又有歐冠盃贏波獎金刺激戰意，一班副選多少都會較波爾多落多兩錢肉緊，主W可靠。
聽日E組秩序，肯定以次名出線嘅皇馬，去到烏克蘭基輔鬥戴拿模，睇皇馬教頭卡比路老謀深算，唔會着眼當前名利咁短視，最緊要季尾交出成績，球會又有錢，邊會旨在大會贏波或和獎金？呢場睇死皇馬「揸流攤」，基輔有得贏！
文︰華度