香港單車手黃金寶日前在亞運中成為男子單車個人公路賽金牌得主，古巨基、鄭融、方力申等昨日綵排音樂會時對此大表興奮，曾是運動員的小方指看比賽時心跳加速，而剛在亞運任表演嘉賓的張學友對於未能在現場看對方比賽感到可惜。
香港單車選手黃金寶在多哈亞運中勇奪金牌，一眾歌手得知後均感到十分高興，古巨基、方力申（Alex）、鄭融及王菀之昨日到九龍灣綵排時都恭賀對方。基仔說：「黃金寶真係好犀利，佢係一個好有經驗嘅運動員，今次佢有咁好成績，真係為港爭光。」
喜重上高峯
方力申表示有收看比賽，他說：「我一路睇電視時個心就跳得好快，真係好緊張。黃金寶攞到金牌真係全憑經驗，因為其他選手都細佢好多，我好戥佢開心，希望佢日後比賽繼續有好成績。」另外Alex得知香港隊於4×100米自由泳接力得到銅牌更感興奮，他說：「喺佢哋出賽前我send咗短訊鼓勵佢哋。」鄭融說：「黃金寶嘅年紀都唔細，之前仲擔心佢唔可以去番高峯位置，知道佢拎到金牌真係好開心，佢好勁呀。」
至於張學友昨日則於中環出席「分享願望的喜樂」八周年記者會，現場有一名患有腦瘤的女孩，終達成到東京廸士尼樂園的願望，故喜極而泣，學友即上前安慰。他表示想帶女兒到基金會派對見其他小朋友，讓她知道幸福非必然。
學友日前任多哈亞運表演嘉賓，他表示很遺憾沒有到選手村打氣，他說：「我一唱完就走咗，睇唔到攞獎，好彩早返，唔係連電視都睇唔到，身為中國人同香港人，攞咁多獎都好開心。」
抄歌非有意
提到側田的新歌《頭條新聞》涉嫌抄歌一事，學友說：「創作人好多時借某啲舊歌作為創作來源，聽歌細心嘅話一定會發現呢啲情況，不過創作人一定唔想咁，會想自己作品獨一無二，唔會特登咁做嘅。」方力申則指雷頌德多年來都被指抄歌，但對方至今仍是最top的音樂監製。
採訪：李珮洳 攝影：陳順禎
