歐冠盃今周中進入最後一輪分組賽秩序，當大家關心巴塞、曼聯、阿仙奴出唔出到線，不過好多大局已定賽事，並非無投注價值，今次投資特攻隊推介國際米蘭下盤畀大家，博拜仁主場贏唔到佢哋。
牽牛
歐冠盃B組已經大局幾定，德甲嘅拜仁慕尼黑同意甲嘅國際米蘭已經雙雙出線，最後一輪秩序，只要拜仁主場唔輸畀國米，都肯定首名出線。不過莊家開盤，始終因應拜仁主場強勢，技術性咁開個主隊讓平/半。德國佬一向識計數，拜仁教練馬加夫更加係佼佼者，打頭3場歐冠盃攞夠9分後，就開始「hea」住踢，已分別同士砵亭同莫斯科斯巴達賽和，夠分出線就算，懶理球迷同投注者感受；今次拜仁和波就攞首名出線，更加名正言順先求穩陣，真係迫佢哋都未必主攻。
呢期拜仁已經唔係01年攞冠軍個隊，球隊無咩進攻板斧外，啲星級球員更加懶洋洋、少走動；有睇過拜仁上周六對慕遜加柏嘅球迷就知，拜仁全隊走得最多，可能只係拿姆呢個後生仔，慕遜加柏當然努力換來1分，不過拜仁攻力真係好有問題。而且睇番拜仁係德甲形勢，已經同不來梅同史浩克04有啲距離，要歇冬前搶番榜首，未來唔可以再失，今仗邊有決心爭勝呀！
講真國米係唔係咁有決心要爭首名，小弟都抱懷疑；不過勝在教練文仙尼，已經幫球隊取得11連勝，創出球會紀錄，未必想咁快斷路；而且阿祖安奴喺巴西回歸後，比賽態度好番好多，今仗比賽競爭意義不大，文仙尼或者派佢正選上陣，阿祖都有戰意爭取表現㗎。
AEK作客要贏有難度
冷選方面，博H組安德列治主場賽和AEK雅典，揀個3.45倍和波；睇番呢組形勢，AEK贏波肯定第2名出線，不過要佢哋作客強攻，似乎冇咩能耐；同組AC主場與對里爾，AEK只要期望AC唔放水，里爾作客贏唔到，AEK攞1分就可以出線。咁微妙形勢，AEK真係攻又怕守又怕，一於博和波啦！
投資特攻隊金句
拜仁打頭三場歐冠盃攞夠九分後，就開始「hea」住踢，已分別同士砵亭同莫斯科斯巴達賽和，夠分出線就算，懶理球迷同投注者感受。