𠵱家班經紀喺一手市場搵食搵到過晒界，基本上已經冇咩分區可言，極其量都只係有主區嘅名號，但係場內一大堆經紀都係嚟自五湖四海，搶得快好世界。
中原將軍澳區同事，最近做咗3單新盤大刁，總值5000萬，分別係營業額達準千萬主管級數嘅余瑞娟，親手促成荔枝角曼克頓山2座高層A室，2185萬元，仲有就係兩單馬鞍山嵐岸相連戶，5座E、F室1100萬元，同埋1座A、B室1680萬元，都係余主管嘅手下包辦。
年近歲晚，開單最實際，一手樓開單率真係好講彩數，人多啲大包圍，中嘅機會率都高啲。不過，問題係經紀集中火力搶攻一手樓，淡市下要慢慢煲嘅二手樓就冇人理，有啲分行甚至長期關門納空租。咁樣嘅運作模式，真係健康咩？