劉嘉玲噚日喺台灣出席水晶品牌Swarovski新店開幕，順便為商場入口嘅巨型水晶展品「明亮之星」揭幕，佢心情好靚，仲即場花咗約一萬港元買聖誕禮物。
嘉玲早前出席台灣金馬獎後，去慶功宴時懷疑飲醉唔小心俾記者影到露點相，佢用普通話講：「當晚我沒有喝很多，那些酒只是小意思，是拍照者心態可疑，誰做愛、洗澡會穿衣？」對於喺金馬獎中被周迅擊敗未能封后，佢話：「我沒有懷疑自己的能力，只是運氣差了點。」
自言一向好鍾意收藏水晶嘅嘉玲又話：「我17歲就開始收藏水晶，家裏有櫃子專門展示閃亮擺設。」問到有冇買水晶增運，佢話：「我在中港台忙得很開心，不需水晶加持，身體已很有能量。」後日41歲生日，嘉玲話佢嘅生日願望好簡單，只係身體健康同心靈充實。嘉玲26日會去北京，參加好友王菲為咗愛女李嫣發起幫助兔唇小朋友嘅慈善籌款晚宴，佢話：「我會以行動告訴王菲，我就在他們身邊。」
王菲女兒再做手術
此外，日前內地有報道王菲與李亞鵬夫婦喺本月26日，同幼女李嫣出席為唇顎裂兒童基金會籌款嘅慈善晚宴，仲會喺現場拍賣三人手模同一張王菲未發行過嘅佛教音樂。求證李亞鵬經紀人馬葭，佢話可能性唔高，李亞鵬仲話李嫣明年三月會進行第二次唇裂手術，呢次手術對嫣兒非常重要，佢會趕喺三月前將戲拍完，好專心陪住佢兩母女。
