一手將思捷環球（330）由細細粒零售股，湊到成為市值近千億嘅藍籌股，前思捷主席邢李㷧，噚日最後一次以主席身份出席股東會。原本華華想近距離，問吓佢嘅感受，估唔到素來同傳媒有傾有講嘅米高．邢，居然喺股東會後，唔該都冇聲就閃咗，非常低調地卸任，剩低新主席兼行政總裁高漢思回答傳媒提問。咁快就新主席見人，舊主席鬆人？
高漢思只頂兩年
技術上都唔可以話華華見唔到邢生嘅，因為思捷好體貼，首先將傳媒安排喺舉行股東會隔籬嘅房等候，仲用咗兩部42吋大電視直播股東會嘅盛況。當股東會完結，思捷亦好「體貼」咁，唔畀傳媒離開間房，等管理層走晒之後，先畀傳媒訪問高漢思，以免產生混亂。估唔到，華華同最後一次以思捷主席身份嘅邢生會面，係咁單向嘅。
除舊迎新，咁就不如講吓接任嘅高漢思。佢話思捷𠵱家生意做得好好哋，唔會話因為佢上場而大幅改變營運方針，佢話唔係「themanofthefuture」，只係「themanofthechange」，職責係幫新管理層管理好思捷，認為「necessityofthecompanyistogoon」。華華都覺得佢講得啱，𠵱家啲跨國企業冇「將軍一去，大樹飄零」嘅歌仔唱啦！
以前成日想退休嘅高漢思仲話，佢頂多再做多兩年行政總裁，之後就會將呢個位交畀其他有能之士。冇計啦，邢生一個唔該走咗，當然要番個有咁上下嘅舊人頂住！新主席，辛苦晒啦！
[email protected]