節奏較明快嘅比賽特色、比賽時段好、當中球星及球隊，都較受球迷擁戴嘅英超聯，無疑仍然係最受本地球迷歡迎嘅聯賽，甚至成為商場上主要籌碼。但呢個聯賽近年入球量持續下跌，亦係不容否認嘅事實；但對於喜玩「大細」嘅球迷，睇直播時就更有捧場方向。
截至上周六，今季進行過嘅151場英超聯，有93場開「細」，比率已高達61.6%；較吸引「大細」注碼嘅直播場合，開「細」嘅比例亦相若，甚至無咁明顯。單計上月，入球開「細」直播場合場數只係比「大」多3幾場，抽埋水都未必有得贏。
但馬會今季中開始多咗樣「中場大細」畀你玩，即係中場休息時間重開「大細」盤，一般都係以上半場比數加1.5球（筆者所見，暫只有上月英冠聯卡廸夫城主場對昆士柏流浪例外，當時半場打成0:0，「中場大細」界定「球數」為0.5球，結果全場客軍贏1:0），作為大場「大細」界定「球數」；例如半場兩軍打成0:0，「中場大細」界定「球數」大都係1.5球；半場就算打成2:2，「中場大細」界定「球數」大都係5.5球。換言之，馬會一直同大家賭緊，單計下半場，有無兩個入球出現！
鮮見下半場入2粒捉「細」
𠵱家嘅英超聯全場都幾難再搵到多過兩個入球出現，淨係計下半場更加少；印象中過去幾輪接近20場直播秩序，夾埋都無5場可以喺下半場出現到兩個入波，捉住呢條「細」路都幾好玩。
文︰華度