成日話啲商人無良心，其實都唔係嘅，好似恒基咁，旗下嘅偉邦物業管理就因為推動傷健共融，又鼓勵員工熱心做義工，所以榮獲社會福利署「支持殘疾人士就業嘉許典禮」嘅最高榮譽「超卓合作夥伴大獎」，跟住同姊妹管理公司恒益，又喺「2006年義工嘉許典禮」掃埋「全港最高義工服務時數獎」私人團體組別2同1嘅冠軍同優異獎，認真熱心公益。
集團執行董事孫國林話，恒基不嬲都好重視企業社會責任，好似近期又有新搞作，同志願團體美奇妙漁農合作社聯手，為旗下西灣河嘉亨灣、將軍澳新都城等提供政府認證優質海魚訂購服務，預計可以開創過百個就業機會。雖然唔係多，但都可以紓緩吓基層失業問題，等政府唔使咁頭痕。
除咗呢啲，恒基物業管理部早喺03年已經同社福機構合作，請啲智障、殘疾同復康人士喺大型屋苑工作，幫助弱勢社群自力更生。其實啲企業多啲關心社會，做吓公益活動，就唔使成日俾人奸商奸商咁叫啦。