恒生銀行助理總經理張樹槐，嗜好跑馬拉松，中環都冇乜人唔知，噚日，佢完成咗人生第17場馬拉松賽事。呢個賽事舉行地點就係隔鄰嘅澳門，同賽仲有張樹槐嘅長跑拍檔、家吓係烽火傳媒董事兼首席財務官嘅郭敬仁，兩人多次並肩作戰，又一齊跑過澳洲嘅馬拉松，佢哋今次一齊到澳門參加第25屆澳門國際馬拉松，由體育發展局及澳門田徑總會主辦。
比賽有過千名來自50個國家及地區、共3000多名健兒，全程馬拉松達42公里，但對張樹槐嚟講可以話全無壓力，皆因唔計港澳，佢喺北京、台北、廈門、紐約、悉尼、倫敦以及馬拉松發源地希臘嘅馬拉松，都跑勻晒，見慣大場面，華華相信佢要喺指定時限內、完成賽事絕冇難度。