一向敢言嘅人大常委會副委員長成思危，11月尾接受內地傳媒訪問，對於內地開始有人睇07年滬綜指數將見4000點，佢老人家認為呢啲言論屬於「頭腦發熱」，佢就唔信可以升到呢個水位（較昨日收市高85%），佢仲警告，如果基礎唔打穩，泡沫最終會破滅，又用逆向理論告誡投資者：「當你興高采烈的時候，你要賣出，當你痛哭流涕的時候，你要買入。」
咁又係嘅，華華睇過幾位成功嘅國際大炒家同投資者寫嘅「投資真經」，佢哋無一例外係逆向實踐者，不過睇見姨媽姑姐都講股，四圍攞貼士，有幾多散戶能夠按捺得住呀。成成不但苦口婆心，原來仲有做功課，佢話舊年做過一個研究，成個股市過千間上市公司，只得400間公司有投資價值咋。
港創業板成反面教材
至於呢排熱門話題，天津申請開辦全國第三個交易所，成成就唔主張大陸再搞多個交易所，原因係佢認為上海同深圳已可以承擔建設多層次資本市場任務，上海主要任務係似紐交所做好主板，深圳就要似納斯達克，做主板、二板同三板，仲話香港創業板嘅教訓值得佢哋借鑑，深圳中小企業板發展到400間公司，再搞二板都未遲。港交所高層同天津市長戴相龍睇見佢咁講，唔知有咩感覺呢？