上周二發展商齊齊出高價投地，為庫房帶嚟51.8億元進賬，樓市勢頭轉好。投得馬鞍山地皮嘅長實，立即話同區嘅嵐岸要加價，1座4房戶加8%以上，但係另一邊廂又搵咗尚乘財富推出全期P（8厘）減3.25厘按揭息率，節省利息開支約樓價7%，並可承造95%按揭額云云。
一時話加價，一時推按揭優惠，究竟係想嚇人定係𠱁人入局呢？《香港討論區》內網友happyluckylucky提出「買嵐岸要小心」，大概意思係尚乘同長實關係密切，即使尚乘保證幫嵐岸買家估足價兼借足錢，但唔知其他銀行得唔得，如果一個唔好彩樓價跌，或者遲得一、兩年嵐岸啲貨尾又減價，到時搵第二啲銀行上會，估唔足價，無端端加入負資產大軍就無謂。
eddieywlee亦附和，話「就算向尚乘借到，唔代表層樓值嗰個價，小心唔好高價買。」
是次為嵐岸提供優惠按揭嘅尚乘財富，的確與長實關係密切，據該公司網頁指出，尚乘財富03年初成立，由超人李嘉誠旗下嘅長江集團，同埋喺澳洲股票交易所上市嘅澳洲聯邦銀行共同持有。
喻買嵐岸等於坐艇
對於嵐岸嘅評價，負面居多，魅鬼打比喻話：「買嵐岸=買遊艇，係用嚟坐。」333666講：「買嵐岸=難安。」
對於樓價，批評更多。Nimos話：「$8000呎可能要學華懋，賣足十幾年仲有貨尾。」nijino說：「買得起$8000呎，冇乜邊個會想住嵐岸啩？」網友fugitive明言「買唔起，唔使驚。」得棚牙慨歎：「我冇本事買！」
正如nijino所說，每方呎8000元的樓即使是傳統豪宅區亦不乏選擇，據中原地產網頁顯示，由太古地產發展的九龍塘畢架山花園一個2座11樓的980平方呎單位，呎價5408元。香港有錢人多，又鍾意買新樓，長實嘅態度一直係唔憂賣，事實上嵐岸已賣咗近300伙。你話佢貴咩？又有人覺得佢平有水位，樓市就係咁。