被訪問足球帶給我一些甚麼喜怒哀樂，橫豎都要諗點答，訪問又冇錢收，不如先在這裏寫出來賺點稿費。
喜者，知道是夜有足球賽事舉行，尤其是有心頭好的球隊作賽，心情當堂很踏實，毋須再為是夜計劃任何節目，亦毋須準備DVD以供解悶，只要有球賽，夜晚將不會寂寞。
怒者，看見C朗拿度又插水搏懵成功，愛之深，恨之切，C朗本來就是一位天才球員，速度快、腳法秀麗、靚仔、身材又好，君本佳人，奈何喜歡作賊，學Keyman話齋，確係一個唔好嘅榜樣。
哀，朗尼仔哨唔起，全場得個走字冇波入；伊度奧受傷冇得踢；洛賓冇得落場；朗拿甸奴不在狀態，走又走唔起，交波冇準繩，射罰球射到九樓咁高，𠵱起棚小哨牙但冇晒笑容；肥仔朗拿度越嚟越肥，越肥就越坐後備，越坐後備就越肥，終於坐到季尾都冇得踢。
樂者，偶像費格遜爵士率領曼聯越戰越勇，球員個個為費爵爺踢爭氣波，將富貴兵團車路士越拋越遠，證明有錢並非惡晒，最快樂一定是見到曼聯最後壓倒車路士取得聯賽冠軍，費爵爺激死車路士領隊摩連奴，等個摩連奴成日咁靚仔吖嗱！