公屋要減租抑或加租？呢日碰到Ｓ教授，見機不可失，以此相問。Ｓ教授未評論之前，先講故事。佢在大學任教，不少學生來自公屋，呢個現象一啲都唔奇，香港嘅考試制度好公平，完全做到優勝劣敗原則，叻仔叻女只有極少數疏懶及失運例子考唔到入大學，故此不論家境，總之憑考試醒就可以做本地大學生。單以人口比例來講，公屋大學生入大學一定係比較多，況且唔少中產及以上嘅家庭，好踴躍咁送子女到外國留學㖭。
大學生在公屋長大，好懂得申請公屋遊戲，Ｓ教授話有啲學生以唔同理由申請公屋，與父母分開住，如果不嫌地區偏遠，輪到上樓嘅時間唔會好耐。好嘞，攞到間公屋，先至搵工，即使人工超出公屋住戶收入標準，房委會已奈佢唔何，最多咪納富戶租金，然後再以公屋住戶身份，用綠表申請買居屋，買到就掂咯，住多五六年，人工加晒，賣咗間居屋換新樓，結婚去也。
呢條橋如一切順利，十分着數，即如二、三十年前，有人趁加薪未夠之前，申請買居屋，中咗居屋王「俊民苑」，幾年後從「俊民苑」搬去新界靚樓，再由新界搬上中環半山區，𠵱家已經印印腳。左丁山一出道已經薪水過高，永遠冇辦法學呢條橋，掙扎買樓，辛苦好多。
Ｓ教授話：「我並不鼓勵大學生走法律罅攞着數，但遊戲規則確實存在漏洞，公屋本來係對貧窮人士之福利，但數十年來演變成世襲制、終身制，出現好多濫用情況，故此我贊成全面性加租。」呢個係好方法，加完租後，可以按一個meanstest（負擔能力測試）俾公屋居民申請退還部份租金。不過呢啲嘢講出嚟，一定俾社工鬧，俾部份人士鬧，教經濟學/財政之人，最唔受福利界歡迎。況且如果數選票，大概有一半出自公屋，立法會議員為了選票，邊度有人敢推動公屋制度改革吖。