華華噚日剛與股壇長毛DavidWebb通電話，佢話好鬼忙碌，事關忙住搞個ChristmasPick（聖誕推介），跟住喺凌晨零時過咗冇幾耐，佢老哥就彈個email嚟，話今年聖誕精選股份係「順龍控股」（361），唔知係咪咁，搞到今日隻順龍成為全日第二大升幅股票，升幅有成36.7個巴仙（附圖），成交額仲有成1590萬！佢老哥隻手指仲勁過隔籬孫柏文嗰隻金手指，可能鑲咗白金，噚日佢老哥點石成金嘅能力，招來一班網民喺網上討論區議論紛紛。
口味獨特揀工業股
𠵱家個市鍾意新股同中資股，好少芬佬會留意工業股，但係DavidWebb由舊年已經開始增持順龍，截至今年9月21日為止，佢已經揸咗成6%以上，除咗佢之外，暫時仲未有人持股量多過5%。通常賣花梗係讚花香，但DavidWebb對呢家公司有讚亦有彈，似乎都幾中肯。
DavidWebb話，根據往績，喺過去7年佢都有聖誕推介，而且幾乎每隻都跑贏恒指成份股，除咗隻亞倫國際之外（見表）。如果你相信DavidWebb嘅眼光、又願意買入順龍作為長線投資，呢份聖誕禮物可能等到07聖誕先至兌現喇！
[email protected]