經典組合Simon&Garfunkel的主音歌手ArtGarfunkel，早前來港舉行個唱期間突然發脾氣，在後台擲櫈兼嫌熱而赤裸上身跑來跑去，一度嚇得個唱搞手樂仕不敢再請他來港開騷。據知，Garfunkel多年來也戴假髮示人，由於當晚室溫太高，戴上假髮後的他不停流汗，難以化妝上粉，以致如此𤷪𤺧。
現年65歲、曾主唱過《Thesoundofsilence》及《Bridgeovertroubledwater》的經典民歌組合Simon&Garfunkel主音歌手ArtGarfunkel，上月來港舉行個唱，其繞樑金曲令歌迷聽出耳油，然而這位殿堂級歌手開騷期間，原來曾鬧出不少風波。
鬧喊化妝師
商台節目主持查小欣昨在節目中說：「原來Uncle（ArtGarfunkel）好好火，情緒變化好大。臨開騷化妝話唔鍾意粉底嘅顏色，發晒脾氣鬧到化妝師喊，最後要全部人去買齊粉底顏色畀佢揀。佢又喺後台除晒衫褲行嚟行去，話太熱唔肯唱，又要保持室溫12度先唱得。樂仕講合約寫到明完騷之後同贊助商、嘉賓合照，但係佢都走咗去，第二場仲要擲櫈！」
收到道歉信
記者昨日致電樂仕了解，原來Garfunkel並非在後台裸跑，而是赤裸上身，樂仕說：「當晚我作咗最壞打算，就係落閘報警，但佢隊band嘅人不停嚟同我saysorry，話佢試過發脾氣犀利過今次10倍，叫我哋唔需要見怪。當晚完騷後，我取消咗同嘉賓合照嘅時間，立即送佢返酒店。點知過幾日佢send咗道歉信畀我，就佢嘅表現講對唔住。原本我唔想再同佢合作，但睇咗佢呢封道歉信幾次，我已經冇再怪佢，始終人人脾氣唔同。」
據知，Garfunkel當晚後台失常，原來與近年他戴假髮演出有關，因為戴上假髮後容易流汗，加上當日室溫太熱，導致他不停流汗難以化妝上粉，所以Garfunkel才表現𤷪𤺧，發脾氣掟櫈罵人。
此外，羅傑承和太太梁芷珊當晚也有欣賞ArtGarfunkel演唱會，芷珊昨在電話中說：「我都聽到話佢喺後台掟櫈，又話粉盒都掟爛埋，但佢喺表演時好平靜，完全係兩副面孔，我覺得就算係天王巨星都唔應該咁囉，嚟到香港就要尊重番香港，呢啲係最基本嘅專業操守。」問芷珊是否ArtGarfunkel的fans，她笑說：「我唔係，我老公就係，我都唔係嗰個年代嘅。」
採訪：林妃
