到四季酒店出席經濟高峯會議，聽專家講未來前景，預測○七年一片好景，大家聽完之後，安樂晒；如果專家預言兌現，明年啲投資銀行家、會計師又可以笑逐顏開。
曾特首開始午餐演講之前，左丁山與坐對面之總裁P講：「你公開談話時，對數字背誦如流，完全唔使睇貓紙，令人佩服，點解你嘅記憶力完全冇退化迹象？」總裁P笑笑口話：「或者因為第一，我讀工程出身，對數字特別敏感。喺大學讀工程，理論第一，數據第二，實際第三。所以我當年到冷氣機廠實習，日日俾啲工人與科文取笑，話港大工程學生唔識揸螺絲批。打工之後，有幸服務馮先生，馮生係天才，一睇就知道邊啲人叻唔叻，請埋一大班青年才俊喺佢身邊，人人今日獨當一面。馮生開會之時要我哋做部門報告，客戶業務數字，如果我哋講唔出，肯定俾佢訓話，故此我哋人人拼命在開會前背熟一切馮生可能問及嘅數字。呢樣訓練，可說係終身受用。」總裁P亦係MBA，佢話𠵱家啲人就幸福咯，讀十五個月（兼讀）就可以畢業，佢當年要讀足四年，四十幾個同學，只有十零位捱到畢業，差唔多係港大第一批MBA。記得當年馮生曾有份大力捐助中大兼讀MBA課程，點解總裁P唔報名中大？總裁P話：「馮生公私分明，我哋成班同事一齊報名讀中大part-timeMBA，馮生唔准，理由係佢唔想外間以為佢捐咗錢就要益番自己啲夥計，結果只有兩三位考試（GMAT，嗰陣好似仲係叫做ATGSB）最高分嘅入讀中大。」如此說來，馮生真高人也，可惜佢過身之後，班猛人夥計就星散，變成後無來者。
總裁P一個月之前到倫敦演講，停留二十四小時住宿一晚就返港，點知日前接到英國領事來信，問佢喺酒店之時，有冇去過酒店嘅PrimeBar等等。為乜事呢？撞鬼，中釙210致死嘅俄羅斯特工利特維年科曾經去過嗰間酒店！好彩專家話即使有人同利特維年科面對面，握過手，不可能因此而受感染！