講佳記大家可能未必識！話畀你知，由佢原創B仔涼粉，大家馬上哦一聲！最近行元朗先知，原來B仔涼粉最近加咗價，由$53微升至$55，足5年冇加過價，都唔算太過份！
去B仔都唔係淨得生果加涼粉嘅！最近新出了一個冰糖川貝燉原隻雪梨，足4至5個鐘清燉，好多人食過都大讚清熱潤喉幾得！原個雪梨咬落勁軟勁腍，老字號，總有幾道板斧嘅。
食咗咁多年B仔，究竟何謂B仔？睇舖內蔡瀾專欄解釋：「大就係B仔！」不過始創人馮太話完全錯晒：「B仔原本係守元朗區一個雜差，佢好喜歡食生果甜品，某日我用一個大西瓜盅加14種生果加涼粉整畀佢食，食完佢大讚好味，自此好多人嚟食都話要『B仔嗰個涼粉』，我咪加入菜單，叫佢B仔涼粉囉！」
佳記甜品（24794743）
地址：元朗又新街置富中心7號舖
