細細個阿媽教落，污糟嘢冇好嘢！俾你見到固然時運低，扮睇佢唔到；如果一啖吞落肚，隨時搞到你上吐下瀉；不過今日介紹嘅「污糟雞」有啲唔同，屬順德名菜變革版，仲要係佐敦名人酒樓──栢苑嘅冬日暖笠笠主打新菜，有幾污糟？睇見Model小姐Isabel食到失晒儀態就知啦！
記者：朱崇德 攝影：陳偉強
Model：Isabel
隱形名人食店
聽尖沙嘴陳老闆講，佐敦有間「老細飯堂」──栢苑創意廚房！「每逢Lunch，全場坐爆、撞口撞面都係附近嘅公司老闆，鍾意呢度食物出品拍得住利苑級數，就係未畀你哋啲傳媒寫過，多咗幾分『隱形名店』嘅寧靜！」
貴氣菜 金豪裝
靜靜走入去，推門一見是一座黃金萬両笑面佛、中國實木雕花陳設、水簾玻璃窗，再配中古歐陸式巨型天花吊燈，感覺都幾富豪級！再同附近食客八料，聽聞老闆係國內經營地產的香港富商，開栢苑嘅原意一半是為了整個「私人飯堂」，所以食物出品除了貴氣，仲多出了幾分住家菜嘅「正氣」感覺。
順德秘製污糟雞$78
取名自順德名菜污糟雞的自創菜式，嫩滑的雞件，以豉油、醬油等汁醬包裹，貌似污糟，配以金針、雲耳、紅棗及大頭菜等老派配料，食落正氣和味；而且足料的配菜，又有如在雜亂的草叢中找選雞件，污糟一詞並非浪得虛名；菜式特別處是加入了鮮磨田七粉，在冷冷冬日更為你暖胃兼補血。
碧綠龍穿鳳翼球$75
以中蝦穿入去骨雞翼中，取名為龍穿鳳翼！翼球先拉油、再回鑊略炒，入口細軟而彈牙；再加嘴嚼後，發現裏面仲藏有雲腿、冬菇、鮮笋，鮮香爽口，食落層次有序。
蝦餃$28/4隻
蝦餃邊度都有得食，但乒乓波咁大個，真係幾罕見！以我大嘴之人，都要兩啖先食得晒！餡料除有少少豬肉，還有蝦、蝦、蝦！份量是足3隻鮮海中蝦，係現時佐敦最具人氣嘅蝦餃王。
濃魚湯過橋大蝦排翅$188
以5斤的鯪魚、紅衫魚及石頭魚等海魚，慢火熬成10斤的濃湯，以火鍋小缽上枱；2両中上等的「五羊翅」（翅針足有芽菜粗），伴以鮮海蝦刺身，分碟齊上；排翅鮮蝦，有如過橋米線般，自燒自灼，真係豪氣十足，據知此菜是立法局議員徐家傑最愛，每次必叫必吃！
薑爆肥牛坑腩煲$78
上等雪花肥牛厚切成坑腩，簡單以薑蒜香爆從煲上；肥牛坑腩鬆化軟滑，又帶點牛扒的肥美口感；入口薑味亦極濃，一則可減其油膩，二則可增其甘香鮮美，食落仲暖笠笠。
創意鴛鴦炒飯$78
一般鴛鴦炒飯多數芡汁淋漓，但這個全以生炒煮成，的確有誠意！「白飯」是以蛋白、蝦仁、蟹肉、帶子粒炒成，食其清香鮮美；「黑飯」是以老抽、叉燒、蝦仁炒成，形似揚州炒飯，貪其味濃，正是一陰一陽、一濃一淡，食出味之「道」。
睇路搵食
栢苑創意廚房（23779633）
地址：佐敦吳松街186-188號
座位：60個
交通：佐敦地鐵站C出口，寶靈街出，聖地牙哥酒店斜對面。
人均消費：約$150
最好賣：濃魚湯過橋大蝦排翅、秘製薑爆肥牛坑腩、特製鐵板生煎骨
