買股票，一向予人高風險嘅感覺，係《香港討論區》，網友Peterwong11，搞咗個買股票係升值抑或保值嘅調查，想知道大家點睇。喺呢個牛市期，超過八成網友相信會升值，不足一成認為保值。
網友Diegolau話：「買股長揸，等於升值加保值，但唔包括買8號仔電盈。」Sekseong講，買股票只求保值，雖然唔係話會升好多，但冇俾通脹食晒，已經好心滿意足㗎啦！ITAA-Calc非常贊成咁話，買股票好過將錢放喺銀行收息，投資強積金就係一個好例子。
網友資產管理亦話：「只要你揸住有實力嘅股票，就一定掂。」Drjoe提議買滙豐（005）長揸，認為佢係升值力最強嘅股票。
滙豐中移動最佳例子
Ab123ab分享炒股理念──就係點炒都好，絕不能夠瞓晒身，點都要留番少少，否則一次跌市，輸晒所有嘅錢，就大件事喇，正所謂留得青山在，哪怕冇柴燒。因為股票價格始終可升可跌，甚至可能會冇晒價值。
其實，想知道買股係升值定保值，好簡單，計吓數就知，假如投資者02年初分別購入一手較為穩陣嘅大藍籌滙豐（005）及中移動（941），成本為36,300及13,725元，以昨日收市價計，分別升咗近6成及1.3倍，減去成本，就知道分別賺咗21,180及17,925元。你話嘞，將錢放喺銀行，又邊有咁大回報呢！