黃聖依同周星馳嘅合約糾紛仲未解決，正喺內地排期審訊，但未有判決前，黃聖依真係闊佬懶理，一樣係戲照接、歌照唱，完全當星爺嘅星輝公司冇到，最近佢仲同那英嘅姐姐那辛合作，佢兩個日前喺上海齊齊出席一個商業活動，高調咁同傳媒講，上個月佢哋已經簽咗唱片約，那辛會為黃聖依出碟。至於同星爺嘅官司，黃聖依話已交畀律師去處理。