政府明年重新推出嘅居屋，唔係價錢貴，就係位置偏遠，不少有心買居屋嘅人，都退而求其次，買番啲樓齡高啲，但勝在係名牌嘅居屋。利嘉閣研究部統計到上個月嘅土地註冊處登記，二手居屋交易有612宗，比10月份多近28%。其中10個成交最多嘅居屋，就有唔少係名牌，好似九龍灣麗晶花園、火炭穗禾苑、大圍美城苑、鑽石山龍蟠苑、黃大仙天馬苑同屯門兆康苑等。另之前畀沉降問題困擾咗好多年嘅將軍澳安寧花園，上個月都有12宗登記，比10月份升咗1.4倍。
居屋成交雖然多咗，但買家對個價都睇得好緊，所以一啲成交比較活躍嘅居屋，好似麗晶花園、穗禾苑同安寧花園咁，個價就跌少少，1至6%左右。
但一啲之前少成交嘅居屋，價錢變化會大啲，好似馬鞍山富安花園就升咗12%，比較誇張啲，參考價值唔係咁大。