港股上個禮拜期指結算，結算前1日未平倉合約總數多達19萬張，好淡雙方嘅惡鬥係點，由賭注嘅勁度睇得一清二楚。美元弱勢雖然助淡友一臂之力，但係好友嘅實力都好雄厚，連續兩日嘅反彈都追番唔少，上個禮拜五港股再跌過，今日淡友應該會乘勝追擊，好友會點應付呢？
上個禮拜五中移動（941）係淡友轟炸嘅目標，空軍啲手榴彈今日會繼續瞄準中移動，滙控（005）個勢都係麻麻，唔會有太好表現，工行（1398）回試裂口支持位，有機會施回馬槍，期油續升，雖然已到咗阻力位，但係好友可能會托高番中海油（883）個價，兩隻恒指新貴應該會為個市提供一啲支持，中行（3988）連續兩日守穩3.7元，補番個裂口，有條件反彈，中石化（386）個勢好強，可以抽高啲幫補吓個指數。
個市未跌完，買貨以收集為主，睇啱嘅跌到支持位企穩先收集，強勢股唔同，今日開市冇轉弱都可以買，咁嘅市況，短炒嘅資金一部份會去抽新股，另一部份仍然會吼實啲國企股上車。
招商局C輪9931：招商局（144）上日報收26.15元，升0.77%，股價曾經升破27元，收市升幅收窄，但係想炒上個勢就一啲都冇變，股價急升之後喺10日線已經橫行咗好多日，成交縮減，短線獲利貨應該已經消化咗，今日應該會繼續炒高，破咗27元收市，先睇30元。
隻C輪9931上日報收34仙，槓桿7.7倍（有效5.5倍），對沖值0.71，引伸波幅42%，正股升破27元，9931應該喺41仙樓上，正股上試30元，隻C輪應該唔會低過63仙，呢個價買，正股跌穿25元止蝕。
俊 樺