企業要名字打得響，做宣傳自然不計成本，但要事半功倍，掌握時機就是要訣所在，呢方面就不得不讚吓過去兩周帶領恒指坐過山車嘅重磅藍籌中移動王建宙，趁住電信界嘅奧林匹克盛事──06年世界電信展（ITU）噚日喺香港會展舉行揭幕禮，喺會場裏裏外外做足宣傳，堪稱最佳推銷員。
中國首次搞呢個世界性展覽就選咗香港，作為主人家，北京派咗全國人大常委會委員長吳邦國主持揭幕禮，騷吓quali，唱好國家嘅電訊業發展。內地電信界龍頭大哥中移動董事長王建宙，亦把握時機加入和唱。
喺會場內佢同華華講，好認同吳委員長開幕禮致辭時講到，中國政府一向高度重視信息化建設，藉此拉動工業化發展；經過廿幾年發展，華為、中興等企業已發展為國際知名企業。同時中國喺第三代流動電話、下一代互聯網等重要領域嘅研發水平，已步入世界前列云云。
王建宙跟住發表高見，話國內嘅電訊企業實力愈嚟愈強，電訊設備製造水平亦愈嚟愈高；如果要將電訊業設備水平分層次，佢會畀內地廠商最高層次嘅評分，而唔少內地設備製造商都已經打入國際市場……係咪賣花讚花香？也難怪。國際電信聯盟策略及政策部主管RobertShaw都講過，華為喺互聯網電話嘅技術，已可跟思科Cisco媲美！
中移動宣傳不費力
場外，王建宙間中移動喺灣仔碼頭整咗個巨型霓虹廣告牌，有成12x56米咁大，會中英文跳字，亮燈儀式喺正ITU開幕前夕舉行。華華點可以唔讚吓宣傳部呢條橋呢？皆因呢段時間各地傳媒都嚟採訪，大家少不免會喺對岸影吓會展嘅夜景，咁就掂喇，呢隻重磅藍籌嘅大招牌仲唔入埋鏡？你話喇，呢位賣花先生係咪抵讚！
[email protected]