美股早前狀態大勇，道瓊斯工業平均指數屢創歷史新高，有人話，美股已升咗三年幾，仲係牛氣沖天，呢隻「老牛」需要唞唞氣；有啲淡友甚至警告，美股牛市快將壽終正寢。不過，部份網民認為唔使咁悲觀。
喺blogspot.com網站，網友DonaldKwan話，美國今年舉行中期選舉，所以美股後市肯定大旺。資料顯示，由1930年至今，美國共有19次中期選舉，其中17次，美股喺中期選舉年嘅第4季平均升約6%，而選舉後12個月嘅升勢仲勁。美國中期選舉喺上月初先至結束，照咁睇，美股豈不是有排升？
畢菲特引退 恐掀大熊市
喺bloggingstocks.com網站，DouglasS.Roberts講，出年美股會好似1995年咁好（當年標準普爾500指數大漲37%），因為美國喺呢兩年好相似：（一）政府由兩個政黨控制，雙方互相制衡，有助改善美國財政赤字。（二）呢兩年嘅美國總統會專心治國，避免捲入政治鬥爭。（三）呢兩年都係美國總統選舉前嘅一年，美股例旺。（四）美國喺95年減息，相信出年亦會咁樣做。（五）呢兩年嘅通脹都放緩，有利經濟。
不過，網民陶博睇淡美股，佢話，美國「股神」畢菲特今年中捐出巨款，可能係因為冇乜美股值得投資，所以不如將啲錢用嚟做善事。畢菲特急流勇退，可能意味美股未來幾年會有大熊市。