記得上周二，恒指狂瀉564點，收18639，雖然噚日升番去18702，又再掀起新股熱，但美元持續疲弱，美國樓市又死氣沉沉，港股前景似乎幾難預測。
Yahoo!網誌《市場先生自語》，早排誠惶誠恐分析「股災三部曲」，佢話，當平時唔買股票嘅人，都被大牛市嘅氣氛吸引，就係冧市先兆。再嚴重啲，就係股壇新丁好輕易賺到錢；如果佢哋賺「大」錢，都易過借火嘅話，危機就一觸即發，仲喺隨時爆煲嗰陣，各路人馬都睇好後市，股神仲周街都係㖭。
睇番99年科網股狂熱嘅時候，IT類新股嘅孖展客高達5成，「科」股交投佔大市40%，「南瓜」證券仲估恒指飆到二萬六，但點知00年1月初首三日，即急挫2216點，跌12.8%，玩死全世界。
咁𠵱家港股有冇股災泡沫？東美證券曾永堅話，以前孖展比例重，一爆煲就引發雪球效應，但現時散戶學精咗，抽新股當抽六合彩，只用現金小注博吓，輸極有個譜。佢仲話，美國經濟麻麻哋，但游資始終充裕，估計恒指明年可上試21300點。
信誠證券連敬涵認為，00年全球行業都「超買」，股災不足為奇，但近半年，港股升咗4200點，高位調整吓亦都好正常。短期跌2000點先算股災，但機會好微，除非再現911之類嘅突發事件。佢又話，即使中資銀行股炒高咗啲，市賬率都係3倍，低過印度嘅5倍，而近期多咗師奶客，都只係抽新股，唔係盲目炒作，大市仍然冇偏離正軌喎。