會計師行除咗接受傳媒訪問外，間接宣傳方式係出報告。最新示範係均富會計師行，佢哋噚日發表咗份《恒生綜合指數企業管治檢討報告2006》，話英國富時350指數中，98%成份股已經符合企業管治守則；恒指成份股則只有61%；綜合指數成份股低至24%；H股指數成份股只有11%，係按呢個企業管治守則辦事。
雖然港交所明年先至開始硬性規定大家執行，但係均富就以「確保香港國際金融市場的卓越地位」呢個冇人可以反對嘅口號，呼籲啲成份股公司加快步伐。均富仲話，香港上市公司另一個需要改善嘅地方係企業責任，英國九成公司已經做緊，認為香港上市公司董事亦絕對有能力影響現時環境，目前只有11%恒指成份股，2%恒綜成份股有做，H股竟然喺呢方面食蛋！不過唔識做唔使怕，均富話佢哋提供業務風險管理服務，即係叫人搵佢哋，明未？