聖誕節一向都係傳統銷售旺季，美國零售商早於感恩節開始就以折扣優惠做餌，引誘消費者大破慳囊。電玩製造商新力（Sony）及任天堂（Nintendo）都唔執輸，早喺11月中搶推PS3及Wii俘虜大小機迷，加埋微軟上年推出嘅XBox360，三大主要遊戲機喺今個聖誕實行埋身肉搏，勢成水火。
新力任天堂微軟 埋身肉搏
銀根短絀嘅成年機迷會三選一，但愛打機嘅小朋友就梗係想三者兼得啦﹗已為人父母嘅網友cschin4就好頭痛，佢喺《MSN》討論區度呻，話啲仔女好想收Wii或PS3做聖誕禮物，但佢就唔多想子女沉迷打機，想買其他玩具代替，但又怕掃佢哋興，都唔知點算好。
網友T-Bird_Money同Toyotamom都覺得，送禮畀人都係想對方開心啫，何必要喺佳節傷害小朋友嘅弱小心靈呢？至於買邊款機畀小朋友最好，網友都有唔同嘅意見，但大多數都贊成買Wii。KevJC話Wii有新式感應手制，玩家可以跟隨遊戲做動作，機價又比其他兩款機平，而且供應量充足，唔使同人爭。如果一定要買新力嘅機，佢就寧願買新推嘅PS3，因為PS2嘅吸引力好明顯已經大不如前。
擺明有fans力撐，難怪日本任天堂公然話，期望Wii今年底之前嘅全球銷售可達400萬部，明年3月底前嘅全球銷售增長則有600萬部啦﹗事實上，Wii遊戲機在美國推出8日已售出60萬部，要達到預期目標應該唔太難；而擁有Blu-ray高清光碟機嘅PS3，原定係日本首推10萬部應市，美國則推40萬部，但實際上，首批登陸美國嘅PS3只有12.5萬部，所以有分析員認為PS3年底前想達標都幾難。
至於一年前已經面市嘅Xbox360，經已賣咗超過600萬部，微軟預期今年底前可賣出千萬部。