恒基發展（097）自從年初私有化失敗，股價以裂口急跌後，在低位橫行已足有一年時間。上周五股價升7.4%，收14.8元。不過股份成交量好細，只得1.2球，而且牌路好疏。母公司恒基地產（012）已經先後兩次提出私有化恒發，但係都無功而回。
第一次係02年底，曾提出以每股7.35元、其後再「加價」至7.6元，但因獨立股東反對比例達到14.4%，令計劃胎死腹中。
最近一次數到去年11月，恒地提出以換股方式，以每持有2.6股恒發，可以換取1股恒地，私有化恒發作價相當於每股約13.23元，溢價約24%。不過，當時市場唔少聲音指恒發每股NAV達16至18元，認為恒地出手偏低，但呢個作價已令主要股東之一嘅鄧普頓覺得滿意，由第一次嘅反對派，變成投贊成票。
不過，第二次私有化最終都失敗，市傳係有對沖基金從中搞鬼，透過借貨嘅投票權投反對票，由於提出私有化後股價已經急升，若然失敗，股價會打回原形，一早借貨沽空，再投反對票，邊有得輸？
恒發私有化失敗後，今年4月中宣布以每股13.55元配售2.3億股，集資逾31億元，令手持現金增至逾50億元。是次配股動機成謎，不過參考恒發今年初私有化失敗前高位都只係15.50元，現價追入博私有化似乎水位唔多。
歐陽風