「我個女𠵱家無事啦！」見Joey笑晒口咁講，仲以為佢禁煙宣傳上晒腦，原來佢係話最近終於買到嗰架「無菌車」，開頭記者仲聽到一頭霧水，後來先知原來講緊豐田最新一代嘅Camry，「𠵱家周圍空氣都咁污染，個女又有鼻敏感同皮膚敏感，咁我見行政版有晒防敏感絲絨座椅、Ion空氣清新裝置，一坐入車廂感覺就好似入咗無菌地帶咁，起碼𠵱家我個女上到車唔會坐到身痕周身郁，我可以放心開車。」
記者：黃婉冰
攝影：林栢鈞
Model：Joey&Sammy
蠶絲座椅＋離子族＝無菌車廂
囡囡Sammy細細個已經有敏感，一有塵佢就會打噴嚏，一上車開冷氣亦會不停打噴嚏，座椅質料差少少，又會坐到用身痕，所以每次買車我都一定要揀有空氣清新功能！後來問過朋友，佢哋話Camry最新版有個「離子族」正負離子產生器及負離子釋放器，可以將車廂空氣過濾，減少車廂空中微生物同異味，長期開冷氣都唔怕困住晒啲細菌，後來我先知原來行政版仲有埋天然蠶絲座椅，座椅質料表面睇似普通絲絨，但原來係經過特別處理，布料含有由天然蠶絲提煉而成的蛋白質絲膠，坐落去又軟又滑之外，最好係唔怕會搞到小朋友皮膚敏感，係2.4行政版先至有。
話你知：正負離子將細菌包圍
當正負離子由機器中釋放出後，可迅速將空氣中病毒、黴菌、異味、有毒氣體等包圍，形成相當活性的氫氧離子（OH），再結合有害物質中的氫原子，破壞有害結構並恢復成水分子（H2O），做到在空氣中殺菌、除臭效果。而負離子釋放器則可令塵埃產生負電荷而黏附在機器內的物料上，減少飄浮空氣中的塵埃。
車廂一代豪過一代
其實我以前都有用過上兩代Camry，新呢一代車廂真係比以前豪華咗，尤其是個淺啡色桃木內飾襯米色內櫳，感覺光猛得來夠豪華，雖然設備同一般房車分別不大，但都算夠用，好似杯架、雜誌袋、後座獨立恒溫冷氣、軚盤按鈕、電動座椅，我覺得以一架廿萬房車來講算設備豪華，反正我買車又唔需要話用到好豪，唯一依然令我頭痕的問題係，米色絲絨座椅在打理方面比較麻煩，無法啦，惟有禁止囡囡上車食嘢同飲汽水囉。
講真，之前都試過用Camry2.2，相比今次2.4，講夠力當然以後者為佳，無論起步個扭力同波箱，明顯都比以前有改進，尤其是懸掛和避震比以前更舒適，對講求駕駛要舒服，坐要舒適的車主、乘客來講，它已屬中高級，我覺得它似一架大眾化的行政座駕多過一架普通房車，但唯一令我覺得有點失望的是，引擎未如想像般寧靜，停車時右腳會隱約感覺到由腳掣傳來的微震，這點是最美中不足地方。
ToyotaCamry2.4Executive規格：
引擎：2,362cc直4DOHC
馬力：167PS/6,000rpm
扭力：224Nm/4,000rpm
傳動：5前速自動波
車輛提供：皇冠汽車（28661020）
車價：$210,750
