冬天成日手腳凍冰冰，要食啲補嘢暖暖身先得！要補身不一定要食中菜，搞吓新意思食西餐都可以好補！Marco's最近推出多款新菜式，首推鹿野仙蹤套餐，一碟有齊鹿肉、牛柳、羊扒配紅酒汁，鹿肉性溫，能禦寒、補虛弱、益氣力、夠晒滋補，食咗之後包保暖笠笠唔怕凍！
記者：林思樂
攝影：楊錦文
Model：Suet
1套餐3種味道
Marco's開業八年以來經常推出新菜式，為食客帶來新口味，最近大廚Marco就於冬季設計了幾款新菜式，其中鹿野仙蹤套餐最滋補。鹿肉除了可以禦寒，仲含有豐富蛋白質，脂肪較紅肉低，健康又唔怕肥。主菜之中一碟有鹿肉、牛柳、羊扒，一次過享受幾種滋味，跟餐仲有招牌龍蝦濃湯，用新鮮大蝦肉、龍蝦肉、三文魚骨、比目魚骨等熬6小時而成，味道香濃，加埋Shooter生蠔做前菜都只需$198。
唔食鹿肉的話可試藍鱈魚或法式燒乳鴿拼西冷牛扒套餐，銀鱈魚就食得多，藍鱈魚比銀鱈魚的肉質更鮮甜，煎得外面香脆，裏面滑溜；而法式燒乳鴿就冇中式紅燒乳鴿咁油膩同熱氣，更原汁原味。兩款新套餐分別$138，價錢好大眾化！
兄弟檔拍住上
大廚Marco和總經理阿Ben是兩兄弟，Marco主內，入廚設計新菜，阿Ben就主外，管理餐廳大小事務。大佬Marco有三十多年入廚經驗豐富，曾任香格里拉、半島、美麗華等酒店的大廚，最拿手炮製歐陸菜式，經常於電視、電台節目分享入廚心得，仲出過兩本烹飪書教煮西餐和甜品。細佬阿Ben就負責打理餐廳，長駐樓面招呼客人，同熟客有傾有講，清楚客人口味，令客人好有親切感，唔怪得咁多熟客長期打躉。
1.鹿野仙蹤套餐（連龍蝦濃湯、Shooter生蠔、飲品）原價$298特價$198
主菜有鹿肉、牛柳、羊扒，全部由新西蘭入口，煎香後配以紅酒汁，更能帶出肉汁鮮味。鹿肉有咬口，羊扒一點都不羶，牛扒更滑得令人讚不絕口，原來是用秘製汁料浸過，所以更入味和嫩滑。
2.三式焗蠔$75
有意大利芝士番茄、芝士菠菜忌廉汁、芝士蒜茸煙肉三款口味。先將蠔拆肉用白蘭地、蒜茸炒熟，再釀回蠔殼內焗，芝士香濃，蠔夠鮮。
3.新西蘭藍鱈魚配意粉（連餐湯、沙律、飲品）$138
藍鱈魚一口咬落去有兩種口感，外面香脆唔油膩，內裏嫩滑，配上新鮮意大利番茄煮成的醬汁更鮮味，墨汁意粉好爽口。
4.鵝肝牛柳配扁意粉（連龍蝦濃湯、三文魚撻撻沙律、甜品心太軟）$128
個個客人都鍾意鵝肝煎得香口之餘入口溶化。跟餐仲有招牌甜品心太軟，焗朱古力有中間流出熱濃朱古力漿，食落甜在心頭令人好滿足，一日閒閒哋賣70份。
5.法式燒乳鴿拼西冷牛扒配薯菜（連餐湯、沙律、飲品）$138
中式乳鴿用滷水汁紅燒，呢個法式燒乳鴿就先用高湯煨，落Order後先再炸至金黃色，所以香脆得來更保留乳鴿原汁原味，配埋嫩滑牛扒，可以一次過享受兩種滋味。
熟客有嘢講
歐生和沈小姐成日來幫襯，歐生鍾意鵝肝夠香，沈小姐鍾意甜品心太軟好好食，今日仲慶祝歐生生日！
睇路搵食
Marco's（23752352）
地址：佐敦吳松街189號地下
營業時間：7am-2am
座位：約60個
交通：佐敦地鐵站C2出口，直行兩個街口至吳松街轉左，在聖地牙哥酒店旁邊。
註：餐廳設有代客泊車
