又到咗年尾做總結嘅時候，最新一期《亞洲周刊》「亞洲企業1000」放榜，以綜合指標計，豐田汽車穩居第一，雖然已經五連霸，但走勢一啲都冇放慢，9月底止嘅上半年營業額同純利，續增15.3%及35.1%，相反，中石油雖然第二年坐咗豐田個亞洲最賺錢公司冠軍位置，不過，油價已由高峯回落，明年仲保唔保得住，就要望油打卦。
若果淨係睇最賺錢亞洲公司排行榜頭十大，日本公司佔5間，中國公司都唔弱，除咗中石油，中移動同中石化分別排行第5同第8（見附表），香港公司則以新鴻基地產盈利最多，排行26位。至於蝕本最入肉榜，南航同東航分別居16同40位，都係同油價高企有關，可以話：賺也石油，蝕也石油。若睇總成績表，中國有排至追得上日本，事關日本公司佔636間，而中國同香港各佔63間和31間。