盈科拓展小股東上星期喺股東會否決出售電盈股份嘅計劃，仲猛鬧管理層透明度低，股價長期低迷，好多嘢都喺睇報紙先知。香港呢邊，雖然有公司股價都長期喺低位徘徊，但就好努力咁增加透明度，同小股東見面，似乎想話畀人聽，遲早有日會否極泰來，呢間咪喺上市到𠵱家，股價都未見家鄉嘅中芯國際。中芯上市價2.69元，𠵱家只得0.95元。
中芯喺11月搞咗個股東茶敍，今年已經係第二年搞，目的係令股東多啲了解公司發展。最近呢次仲請咗市務助理副總裁俎永熙博士，由上海嚟香港同股東解釋公司嘅技術及發展。
至於曾被半導體龍頭台積電起訴，話中芯侵犯佢哋多項專利權及非法竊取商業秘密，兩間企業恩怨未了，近排台積電又再提出訴訟，搞到中芯股價曾經連九毫子都不保。不過，有位小股東唔多擔心，仲話：咁證明台積電感到中芯嘅壓力，驚中芯未來會超越佢哋啦，中芯員工要更努力上進呀。華華諗，呢個股東如果由上市揸到𠵱家，已經輪咗六成半，竟然仲可以咁支持間公司，真係中芯嘅頭號粉絲，董事長張汝京應該好開心。