早前俾雜誌影到背妻偷食，同圈外女友去泰國玩嘅馬德鐘，噚日以職業健康大使身份聯同歌手謝安琪、林子萱、關楚耀等，喺奧海城出席活動，馬德鐘示範正確坐姿。有傳馬德鐘俾緋聞拖累影響形象，本來佢佔好多戲嘅劇集《歲月風雲》因而被減戲份。
馬德鐘噚日好避忌猛話私人問題唔多講，記者話驚佢成為雙失人士，失業兼失戀，佢死撐話事件對自己冇乜影響，佢話：「唔知喎，有時啲嘢控制唔到。好彩一直都有工作，另一面（感情生活）都冇失。」其間佢為咗向TVB擦鞋，猛咁宣傳18號有新劇《爭霸》首播。
向樂易玲求饒
發生咁大件事，馬德鐘話有同高層樂易玲求饒補鑊，佢話：「一路有冇事都同公司有溝通，公司一直畀好多機會我，我一直都咁乖。」問佢太太同個仔有冇問起佢嘅偷食事件，馬德鐘就話𠵱家科技先進，喺外地應該睇到報道，但就唔願多講。偷食斷正都仲話自己一直好乖，呢啲咁嘅說話係佢咁厚面皮先講得出。
