貝廸斯前日主場對馬德里體育會前，推出新會歌（準備慶祝出年百周年會慶），又燒晒煙花，搞咁多嘢原來都係粉飾太平。呢場波，貝廸斯因為炒咗兩個12碼輸0:1，令我求大俠無辦法唔信隊波真係有問題。
假如有睇本報客席名家鄭兆聰專欄，應該知貝廸斯內部立立亂，例如教練艾路列達上周召開緊急會議，一心同班球員溝通吓，點知炒大鑊收場；另外又有「二五仔」向傳媒放風話隊波唔掂。前日隊波兩球12碼都不入，固然可以話對方龍門李奧法蘭高有料到，兩球都吼到路，但據報貝廸斯兩球都處理得唔好。
第一球係前鋒路爾斯伊度俾李奧法蘭高救完，桑尼圖摩蘭奴補中唔入；跟手到費蘭度米基爾親自主射自己博到嘅12碼，但個波力度唔夠又被擋出。射12碼，除咗講運講信心，仲要講決心，呢兩球完全睇唔到貝廸斯球員有heart囉！唔通係鬥氣之作？睇見艾路列達喺場邊好失落，怕且都擔心緊自己前途。
托廸做劊子手醒神
其實前日4大聯賽有好多個12碼出現。貝廸斯兩球炒晒，羅馬就憑一個球員操刀入晒兩球反勝阿特蘭大。邊個劊子手咁醒？咪係今季曾經3次射失12碼嘅托廸囉！睇佢射兩球都信心爆棚，斷估唔會再有球迷質疑佢射12碼嘅能力啩？
「我唔敢話貝廸斯球員兩球12碼都炒，就一定有景轟，總之由看官自己判斷啦！總之隊波衰到咁，呢期吼其對家穩陣。」