港股喺過去個零月，成交日日四百幾五百億，炒友慣咗大成交市況，噚日忽然「淡靜」，成交減到372億，網上即刻見好多人呻悶。成交減少，好大原因係資金去咗抽新股，加上港股家吓正喺高位徘徊，爆上同爆落機會差唔多大，好多散戶都唔敢太勇。
大市雖悶，中資銀行股依然不乏捧場客，經過近期調整後，唔少散戶又再心郁郁想入市，交行（3328）係其中一個目標。隻股噚日收7.16元，跌1仙。
上周四，滙豐證券出報告，降低交行目標價至6.10元，報告出街，交行股價唔見大震盪，網上即有人以「陰謀論」推測，指呢個係滙證陰招，旨在壓價，然後趁低收集，「可惜」交行股價冇反應。
噚日「香港討論區」入面，網民cruztony問大家，邊個價位買入交行最好？佢話，想喺6.90元落限價盤買入。
polyman認為，限價盤太低：「SET6.9都買唔到啦，一到7蚊邊就俾人擸晒。」
尹天照提出長短炒策略：「短炒可以，長揸要等再低啲先。」
Keto250係大好友：「現價不買，冇機會！」
尼古拉伯爵悔不當初：「我等咗好耐啦，嗰陣4.5放咗，仲想等到落番先買……點知。」
圖表上，交行9月中突破大半年橫行區阻力5.20元後，股價好似裝咗Turbo咁，上月中最高上到7.56，最近兩星期，正以下降旗形整固，一旦上破7.20阻力，量度升幅可見7.85，如果諗住短炒，可以吼挨近保歷加通道中軸7蚊附近買入，跌穿6.84止蝕。
余文