點樣搞政治公關，左丁山唔識，屬於一般人，識彈唔識唱嗰類。譬如批評阿仙奴踢波華而不實，好睇唔好食，係賭波毒藥；譬如批評電視劇一無是處，譬如鬧周一嶽疏忽食物安全……但如果叫我哋呢啲「梳化椅批評家」落場踢波，鬼有力咩，實俾費比嘉斯玩死。
批評係言論自由之表現，人人有權，唔可以話：「你都唔識，收口啦！」你識嘅話，咪逐項反駁囉。政治人物演講前，施政前，好多時都要諗清楚公眾角度，從普通人、學者專家嘅身份去諗諗，如果我哋講咗一啲某某言論，外間有乜迴響？如何應付？成竹在胸之後，先至發表。
呢排曾特首嘅運氣麻麻，施政報告講幼稚園學券制，左丁山第一個拍掌，點知去到落實層面，原來係有條件限制之學券制，與學券制原意不符，市民立即噓聲四起，特首接到個好波，點知跌番落嚟，用美式足球術語講，fumble得好杰。
跟住呢，特首出席商界嘅「空氣約章」簽署儀式，發表談話，為香港空氣辯護，竟然提出「長壽論」。唉吔，現在港人長壽與目前嘅空氣污染程度，冇科學性之相關關係，特首咁講，犯正邏輯錯誤，乜佢身邊嘅紅人冇提點佢咩？曾特首本來好熱心環保，好有誠意改善香港空氣質素嘅，但一次失言，立即俾好多人圍攻，包括學者教授、醫生、高級行政人員等等，大家睇吓《南華早報》讀者來函就知道一二。喂，呢班人唔係基層市民，人微言輕噃，寫信鬧特首嘅包括BALtransHoldings嘅香港CEO、來自瑞典嘅HenrikvonSydow先生，住喺大潭（空氣好之高尚地區）。BALtrans係大公司，業務遍及亞洲歐美，通常大公司高層為咗政治正確理由，絕少寫信去報紙批評政府嘅，但呢位vonSydow先生一家四口來港幾個月之後，不時喉痛咳嗽，聽到特首講香港空氣冇乜大問題，於是揮筆直書，不求政治正確。曾特首喺空氣污染問題上，第二次fumble，識搞政治公關之人，唔該幫幫手！