近排新股熱，唔單只股民要忙於分析邊隻股值得認購，負責籌備上市嘅保薦人更要趕工，唔知係唔係因為咁，所以會出錯。喺《香港討論區》網友egypt真係好好眼，喺錦江酒店嘅白表英文版嘅一大堆英文細字裏面，竟然發現串錯字，擔心如果跟住填，會當填錯表而被拒絕認購。
出錯地方就係白表英文版講申請手續嗰一頁，講到用銀行本票付款時嘅抬頭人，印住「HorsfordNominessLimited-ShanghaiJinJiangPublicOffer」，其中「Nominess」明顯串錯（見圖），應該係「Nominees」，而表格其他部份都冇印錯。
負責錦江上市嘅公關公司發言人話，如果散戶填抬頭人時用咗「Nominess」都冇問題，照樣承認，唔會當你填錯表格。
其實03年中國財險招股時都曾出現類似問題，當時白表上提到嘅支票抬頭人係「Nominee」，少咗個「s」字，當時保薦人話填少個「s」都可以照樣過數。
不過，如果其他新股表格冇印錯，投資者都係小心為上，因為支票或本票串錯抬頭人嘅話，好有可能當你填錯而唔畀你申請，咁就連博一博嘅機會都冇埋。