美國近期經濟數據欠佳，著名經濟學家克魯曼（PaulKrugman）和魯比尼（NourielRoubini）早已警告，美國經濟衰退迫在眉睫，不管美國政府或聯邦儲備局，都唔能透過財政政策和貨幣政策扭轉亁坤。喺《MSN討論區》，有人問：「美國經濟會唔會再出現『大蕭條』？」
NMcQueen話，美國樓市正降溫，但樓價仲好貴，好多中產階級人士都買唔起，樓價恐怕會進一步下滑，加上工資停滯不前，醫療保健開支唔易負擔，養兒育女嘅開支又係咁升，種種迹象都同20年代（大蕭條發生前）差唔多，唔通歷史會再次重演？最弊𠵱家美國財政赤字好高，萬一經濟真係出現問題，政府可能無力救濟普羅大眾。
失業可到墨西哥搵工
MarcusR亦有同感，佢話隨着樓市放緩，美國人透過樓宇按揭借錢買嘢嘅能力會下降，消費開支會減弱，當地經濟將難免陷入衰退。Woman講，有專家話美國如果再次遭受好似「911」咁嘅恐怖襲擊，經濟就會陷入大蕭條。
不過，從事金融業嘅MillertheLarge反駁說，美國經濟應不會這麼差。CRONEWITCH話，如果將來失業，可以去墨西哥搵工，嗰度有好多職位空缺。
至於美國經濟問題嘅成因，M2Handsome就歸咎於非法入境者，認為佢哋壓低工資，耗用社會福利，而且令罪案增加。
歸咎布殊逃避問題
至於網友ABC則認為，美國應該檢討一下自己嘅對外政策，布殊一味回避國內問題，有事時就出打國際牌，話其他國家威脅美國，將國民嘅視線轉移到國外，簡直係駝鳥一樣，唔敢面對自己國家問題，所以攪到美國依家嘅經濟出現困局。