寰宇（1046）係仙士股，但大折讓、低PE賣點齊晒，兩個字：「抵搞」！寰宇扣埋06年度0.9仙派息（13厘息）後，每股淨現金仍然高達8.1仙，幾乎睇齊現價（8.2仙），財政狀況靚到爆。又呢期中國星（326）賣100套片，套現1.4億銀，獲利3500萬銀，反映喺電視數碼化年代，電影版權有價，屬於禾稈冚珍珠。𠵱家陣寰宇電影版權賬面值9574萬銀，係咁易整多30%上去，寰宇NAV去到0.21元，折讓60%，又係吸引到痹。
再講，寰宇主席林小明接受訪問，話做咗電影呢行咁耐，係有感情，但講明自己係生意人。搞電影兼顧係咪搵真銀，對小股東嚟講，係好事。而呢期集團透過連續電視劇衝出重圍，07年度純利，隨時又兩三千萬銀落袋，PE都係講緊6、7倍。寰宇現價翻半番到0.123元，到時，PE都係講緊10倍，兼且未有耐到NAV水位。
德祥好快食爆棚
德祥企業（372）係殼王旗艦（殼王揸34.99%），兼透過德祥揸住好多二三線。港股狂牛，屢創新高，德祥仲企喺接近兩年低殘位，就算集團旗下二三線升到甩轆，殼王家底，未認真受惠。
但要咁睇，殼王有往績，所以市場又稱呼佢做「爆棚哥」，估計旗艦德祥，唔會如此這般。又純睇勢，德祥由7月到家陣，一路兜圓底，醞釀爆邊。呢期買德祥，首站目標博佢見NAV1.2元，即係現價（0.6元）翻一番。