早幾年搞到滿城風雨嘅紅磡紅灣半島，發展商之一新世界嘅梁志堅話，𠵱家等緊批大廈公契，批咗之後就隨時可以推出嚟賣。其實，唔少網友對呢個用咗10億提升用料嘅前居屋都好有興趣。
網友mark2009喺《香港討論區》以「紅灣半島應該開乜價？」開題，佢話「假如紅灣半島居屋間隔、豪宅用料，你認為值幾多？我認為海景$6000（呎價），樓景$4800。」dbp覺得發展商會更加勇，「我認為海景$10000，樓景$6000，之後愈賣愈平就另一回事……」ykfp就趁機諷刺今時今日發展商嘅賣樓策略，佢話「開咗個天價先，大家好嘛…蝕咗嘅，咪當佢唔好彩囉。人生出嚟，唔做農奴，都要做吓樓奴，唔畀人奴過，係唔過癮嘅！」
有網友睇死紅灣半島會愈賣愈平，dansan168就認為可能有啲希望，佢話：「實用率會否比家陣啲縮水樓好？因前身是居屋！」不過okman167就搵番04年嘅新聞出嚟提提大家，當年堅叔點樣踩到啲間隔一文不值，「新創建母公司新世界執行董事梁志堅說，紅灣窗口細、喉管位差，大肚婆在廁所難以轉身……」究竟使10億可唔可以化腐朽為神奇，然後天價開盤，就要等新世界同新地揭盅嘞！