噚日《人民日報》刊登咗國家主席胡錦濤，11月30日喺中共中央政治局講話，大講要擴大基層民主，仲話要保證人民群眾直接行使民主權利，可以依法管理自己嘅事情，呢個先係社會主義民主最廣泛嘅實踐咁話。香港就快有特首選舉，作為民主派候選人嘅梁家傑，梗係食住上，話胡主席咁講，同香港民主派爭取普及而平等嘅選舉、希望吸納民意作為施政基礎係一模一樣，比煲呔政府思想更先進。梁家傑咁講，自然係想阿爺畀足夠提名佢參選，但佢似乎忘記，中共強項係講一套，做又另一套。
不過傑哥唔使失望，因為佢嘅立法會同事蔡菜子喺港台節目《政壇新秀訓練班》搞嘅「政壇廚房」上，煮咗一味寓意「百般滋味在心頭」嘅糖醋魚，指明要送畀梁家傑，表面好似話參選有好多辛酸，其實背後可能想提醒傑哥，選票同淡水魚一樣，供港與否都係上面話事！至於湯家驊就整咗個「參選挑戰鯉（你）」嘅鯉魚形芒果布甸，要送畀煲呔，擺明車馬下戰書。