記得八年前，筆者跟友人替一位有錢佬「立下奇功」，佢請我哋食慰勞宴。滿以為鮑參翅肚一定冇走雞，連早餐都只係蜻蜓點水準備留肚，誰知品嚐嘅竟然係家鄉小炒！最谷氣係佢講咗句：「係老友先食呢啲家常便飯。」我哋一直都當佢玩嘢，直至今次跟「食神」韜韜遊雙城（莞城、羊城），連佢都咁講：「鮑參翅肚唔係唔好食，但特色風味小菜，更見廚藝真章，平嘢整得好食，先至係廚神最高境界。」
記者、攝影：鍾浩強
模特兒：Cat
鳴謝：EGL東瀛遊、開心旅遊、廣州東方賓館、東莞匯景酒店
跟韜韜狂食72小時
講明「雙城3天美食豪華團」，喺直通東莞嘅豪華巴士上，韜韜劈頭就講「FUSION」：「飲食無國界，今次走勻東莞、廣州、深圳，搜羅咗唔少別具創意嘅美食，好多盞鬼小炒香港一定食唔到！」
「食唔到」呢三個字言猶在耳，都真係擔心「食唔到」！三日行程食足三日再加消夜，中途已聽見「食飽容易餓死難」！呢句說話我第一次聽都覺得幾刻薄，但出自一位喪食口痕友飽餐後嘅有感而發，我都唔會太怪佢。因為經歷呢三日喪食行程，食足超過一百道菜式，全部都係當地名廚撚手招牌貨，我諗你都會認同呢句說話。
Day1 肥美禾蟲夠薑就食
初到貴境當然要試吓東莞嘅特色菜，第一餐「莞鄉佳餚美食宴」，喺東莞「花園粥城」進食，十三道家常小菜雖不離雞鵝豬，但做法特別，我最欣賞嘅係「莞城蒸鹹糭」，同香港茶樓嗰啲鹹肉糭係兩回事。好戲在後頭，晚飯於東莞市「滙景酒店」，必食「缽子焗禾蟲」啦，你喺香港點可以食到咁肥美嘅禾蟲呀？
Day2 和味龍好和味
第二日驅車前往廣州，真係要跟韜韜先搵到呢啲咁偏僻咁地道嘅食館，呢間「東興飯店」，專食黃鱔出名。中國飲食世界有金句：「夏吃一條鱔，冬吃一支參」，可想而知黃鱔嘅藥用價值係幾高。韜韜一邊狂食黃鱔煲仔飯一邊話：「黃鱔蛋白質高但低脂肪，可以抑制心血管疾病！」團友收到，立即狂食！誇張到連飯焦都攞入廚房加湯再滾爛飯，真係一粒都冇嘥！不過，筆者同靚女Cat就鍾情芋苗，貪佢高纖維，幫助消化，我喺香港就未食過。
頂唔順，晚餐是時候來頓素食小菜。但食落一啲都唔齋，十三道菜真係胃容量小啲都食唔晒。點知兩小時後，又有一餐「霸王別姬」嘅消夜喺「美景海鮮酒家」等緊我哋，而所謂消夜，都有九碟呀老友！最搶鏡梗係「美極金邊龍虱」啦！即係和味龍。口痕友問係咪曱甴？難得靚女Cat跟住韜韜照食。「嗱，阿女，拆咗對翼，攞走對腳就食得，止夜尿㗎。」有靚女帶頭，班猛男先敢放入口咋，陰功！
Day3 LastDay仲唔去滾？
最後一日我哋喺「廣州竹慶豐酒家」食到一種好特別嘅「紫花山別」水魚，呢種水魚佢哋自家飼養，以餵鳥嘅食料去餵食，養足兩年，肉質結實有彈性，淨係呢味滾水魚再加特色瓦罉焗餐包，都夠我飽食一日！
一場嚟到深圳，冇理由唔滾㗎？靚女Cat扁埋個嘴望住我。小姐，最多帶埋你一齊去滾喇。呢間全中國有三百幾間分店嘅「孔亮火鍋」，幾蚊一碟有交易，但食品都係新鮮秘製，其中野生鱔魚，用山珍鴛鴦麻辣鍋品嚐就最惹味，如果鍾意滾嘅老友，肯定嗒晒糖！
順道做西關大少
跟得韜韜明知唔會主攻遊覽，但一場嚟到，唔通餐餐食完就坐喺巴士等下一餐咩！位於虎門的「西關民俗館」是清末廣州富戶在西關興建的住房形式，內部裝飾以明清二朝之廣式家具為主，實行喺度做半日西關大少咁大把。再踩落虎門海戰博物館，了解香港點解做咗英國殖民地。仲有嶺南盆景園同埋茶藝館，搵晚暢行千年古道之北京路步行街，替為食之旅畫上圓滿句號。
必遊
必買
後記
對於平日以快餐飽肚嘅筆者及靚女Model阿Cat嚟講，呢三日過百道餸菜真係可以用誇張嚟形容。小記同靚女Model更同時患上「厭食症」！厭食麥記！豪記嗰啲即食文化呀！
遊Guide
韜韜雙城之旅「莞城、羊城」3天美食豪華團
出發日期：12月4日
行程：於尖沙嘴集合先來個自助早餐才出發，三天兩夜將跟韜韜食勻莞鄉佳餚美食宴、滙聚美景良辰宴、竹豐私房菜、龍鼎袈裟宴、霸王別姬、濃郁鱔香惹味菜、千秋孔亮巴國火鍋等。另遊飲食風俗博物館、茶藝館、嶺南盆景園、西關民俗館等。住宿五星級酒店。
團費：$2,199（若非韜韜親自帶團$1,799起：即日至07年1月31日，逢星期三、五出發）
查詢：23152000（EGL東瀛遊）