曾淵滄教授（十一月三十日）講廣播道一號賣地，呎價9868元，豪宅非人人買得起。梗係啦！有數得計，唔通廣播道一號會起一啲五、六百呎嘅小單位咩，一定係要千二呎起至三千呎嘅單位，先至有啲派頭，落成後，最便宜嘅平均價要去到一萬五千蚊。唔好質疑信和賺到暴利喎，呢個價錢，信和大概只係賺到三成利潤啫。投資三年，賺三成，有乜咁好？睇吓《經濟日報》今年中期業績，半年營業額有四億元（升11%），除稅後股東溢利五千六百三十八萬，獲利率有14%，淨係講回報率，報紙可與地產相比。當然，講銀碼之大，地產就大晒。
有錢中產買一層千二呎單位，樓價一千八百萬嘅話，按廣播道一號拍賣價計算，地價佔咗一千一百八十四萬，呢千一萬地價實際上、本質上，係土地稅，買樓人士交畀地產商，地產商送番畀政府，只不過地產商做「批發」，一次過交十九億四千萬畀庫房，再分期向買樓人士收回而已。試想像，如果唔計地價，層樓會便宜幾多！不過，根據需求原理，成本不決定價格，理論上即使地產商以一蚊買廣播道一號地皮返嚟，佢仍然可以按照市場需求，以一萬五千蚊一呎賣住宅單位，咁嘅情況之下，就真正係謀取暴利，如政府一聲唔該，抽稅65.5%，地產商暴動都似。用現在嘅方法，就冇人會嘈。
計過條數，有資格用一千八百萬買千二呎樓，實質繳交土地稅一千一百八十四萬之人，應該賺過唔少錢，一生交薪俸稅嘅數目怕且都有千二萬，六十零歲退休之時，為庫房貢獻起碼二千四百萬元，值得自豪。但係，如果香港特區引入GST，就要交稅交到死之日，死咗仍然要由子孫代交殯儀館嘅GST，諗吓諗吓，中產人士有乜辦法唔㷫吖。唔好講香港薪俸稅低，稅基窄，「地產稅」其實高到令人透不過氣來。