今次吳邦國訪港，竟然一句挺曾嘅說話都冇講，陪住吳邦國出出入入嘅煲呔，你話唔驚就假。唔知係咪同吳邦國唔太熟（至少肯定冇佢同廖暉咁好傾），所以噚日所見，吳邦國接見煲呔時，煲呔罕有地表現比較緊張，不時昅住貓紙都係其次，仲要好似唔敢直望吳大委員長咁，係咪驚自己啲普通話馬馬虎虎好醜呢？
講真，可能吳大委員長對香港政界嚟講，始終缺少咗一份魅力，所以噚日出席歡迎晚宴嘅人唔算太多，得嗰200幾300人，同政府原先想請嘅400人相距甚遠。好似通常都會出席撐場嘅超人李嘉誠都冇現身，只派出大仔澤鉅上場，唔通怕八方問佢同細仔澤楷係咪不和？
反而同中央好似唔多啱key嘅陳太就有赴會，仲不時主動同人打招呼，好熱情咁噃；當然，陳太同吳大委員長坐到相距十萬九千里，唔使旨意有機會密斟，不如慢慢享受有鮑魚又有燕窩嘅晚宴仲好過啦。