唔准改波箱、引擎、底盤、車胎，無得揀車種同車型，咁嘅賽車你玩唔玩？梗玩啦，純技術同智慧較量喎，刺激咁多，唔再係人多改車叻就得！冠軍方程式環球賽事（ChampCar）正正就係咁玩，出賽車全都屬大會指定，規格、性能一模一樣，要贏絕對靠技術，輸咗都冇得賴地硬啦！
記者：黃婉
攝影：林伯
底盤喪減165磅
聽到話唔准改車又無得揀車種同車型，聽落好似唔多吸引？唔好咁快失望住，睇埋架07年出賽戰車先講；今年大會就特登搵ElanMotorsports為出賽戰車度身訂做一個名為「DP01」底盤，最強處在於重量比一般賽車底盤足足輕咗165磅，改造時間足足20,000小時，一次過減165磅都唔止，新車仲會配上一副足有850匹的「Cosworth」XFE引擎，加上各項改良好似魚鰭形設計的尾翼、鯊魚鰓入風口、伸縮式電池盒、半自動腳踏式換檔系統，置入了「Cosworth」渦輪增壓的油門節流系統等，好明顯，車廠落足心機去改車，務求令新車更輕更快更堅固安全，難怪時速可高達340km/h，直逼F1！
首次試圈已破紀錄
為了讓傳媒親身感受全新ChampCar改良成果，大會特別安排了曾參與過F1賽事、現為ChampCar賽車手的RoertoMoreno親身試車。落到Track影完車，終於見到Roerto一身車手look亮相，只見佢氣定神閒坐入車廂，隨即架車已經「轟」一聲起跑！就咁睇起步好似差少少，但點知跑完第一圈WarmUp後，速度愈嚟愈快，1分30秒、1分24秒，1分23秒9，最後更以1分23.9秒極速完成FinalLap，刷新了珠海國際賽車場紀錄。第一次踏足中國，係咁易試幾個又話破紀錄，到5月真正落場較量，邊個夠你玩呀？
人車齊齊被圍
ChampCar更快更抵玩
與F1齊名的「冠軍方程式環球賽事」，（ChampCarWORLDSERIES，簡稱CCWS）在1906年源於美國，到現在已有100年歷史，除了參賽車要求與F1有所不同外，積分規則亦與F1有別，ChampCar每個完賽的車手都將獲得相應積分，而且針對標桿和最快圈速都有獎勵積分的措施。還有一樣不同的地方，就是F1向來被視為「燒銀紙」玩意，但ChampCar就經濟得多，要營運一隊車隊只不過200萬美元左右，比起下下億億聲的F1確實抵玩得多。
最公平嘅極速較量
在車手心目中，ChampCar難度還要比F1高，就連曾經參加過F1比賽的車手RoertoMoreno，都認為這玩意勝負全靠車手智慧、策略同技術：「F1比賽，車手可以獲得各方面的支援，有工程人員去提升車的性能，但ChampCar卻是完完全全要由車手去控制，遇上任何困難，亦只能靠車手自己去做決定，解決所有問題。由於每位車手都用同一型號同一引擎的賽車，所以車手只有靠技術和策略來取勝，再不是靠工程人員的改車技術，稍有判斷錯誤就會被其他人的車超越，所以這是一場絕對公平競爭的賽事。」
