時間分為過去、現在同將來，若將不同時空互相影響，又會產生怎樣的結果？今個星期推出《情流戀屋》DVD之中，主角奇洛李維斯同珊廸娜布洛，在《生死時速》之後，在芝加哥再度遇上，不過被時間所分隔，要見面？兩年後吧。《情流戀屋》的故事和韓片《觸不到的戀人》結構相若，但不同之處在Feeling上，《情》片比較寫實，唔會睇完大喊一場。可惜隻碟Bonus唔多，欠了人物訪問同拍攝花絮，睇到唔多夠喉。記者：許福合
未煲碟前，有必要先了解《情流戀屋》時空結構，否則一個不留神，就分不清楚時間。
官方故事大綱是這樣：
凱特（珊廸娜布洛）要離開湖邊大屋，於是打算留字條給下一位住客，即艾利斯（奇洛李維斯），在經過幾次互傳字條之後，最後確認大家雖然處於同一地方，不過卻身處兩個時空，兩年前同兩年後，最後更藉書信萌生一段兩人獨有愛情。
介紹雖然簡短，不過相信都能引起你回憶，無錯，就是幾年前韓片《觸不到的戀人》，演員場景雖然完全不同，不過故事結構相若，但又並非搬字過紙，重拍再加上新創作，比原劇本豐富了不少。
故事喜出望外
誰說翻炒一定不好？今次《情》片將《觸》劇本重新編排，變成曲折離奇，又耐人尋味，比《觸》更強調浪漫，《情》內容明顯變得豐富，兩人雖然身處兩個時空，但艾利斯仍追尋到凱特的過去，相約一起結伴遊芝加哥更係一絕，最後凱特見到艾利斯兩年前在牆壁留下字句，效果更是出奇地好。《情》在男女主角情緣亦花過不少心思，原來在通信數次後，艾利斯在一次派對上原來曾經見過吻過凱特，不過兩年前女主角還未認識他，只可算作一段插曲。另外在人物描寫上，亦變得比較主動積極，艾利斯就曾經於凱特樓下（當時屋子還未建成），種樹為她擋風雨，雖然表達方式好奇幻，但明顯好受落，勝過晒甜言蜜語。由於劇中人大部份時間，都是用書信來溝通，所以導演經常安排讀信時互相交流鏡頭，甚至在同一場景對坐，營造超越時空效果。
結局拖太長
若要數《情》與《觸》片之不同，主要在於Feeling上，《觸》片帶有淒慘氣氛，不少人就話睇完會大喊一場，《情》片比較寫實，雖然取景到拍攝手法都好「靚」，就是缺少《觸》內涉及時空時那種疑幻疑真嘅感覺，總覺欠缺一點畫龍點睛的效果。而此片結局也拖得太長，尤其是當女角與另一人同居兩年才再遇上男主角，亦令人有點難以接受。可能《觸》給觀眾印象太深刻，又或者主觀地認定改編不及原著，總會處處將兩片比較，選角就是其一，《生死時速》中奇洛李維斯同珊廸娜布洛的確型爆，不過十幾年後，若拿來跟《觸》內李正宰、全智賢比較，實在有點那個……
種樹種到咁靚仔
這邊廂艾利斯辛辛苦苦挖地種樹，那邊廂兩年後凱特身邊會突然多一棵樹，而且更是由細變大，原來種樹咁型仔，我又種。
神奇信箱
故事一切起點都源自這個信箱，美版同韓版信箱設計當然完全不同，但最神秘是美版信箱手柄，有信時會有動作，差點以為睇緊鬼片。
1區VS3區
《情》片並非動作科幻片，所以論畫質，3區同之前推出1區都相差不遠，加上筆者問過旺角幾間碟舖，都話無1區碟在手，所以要欣賞此片，可以直接買3區，唔會入錯貨。
華納發行
售價：$138
查詢：31281791
Bonus好過無
《情》DVD版屬於單碟裝，除了正場電影外，另還附有電影預告、Trailor同刪剪片段，連基本人物訪問都欠奉，真是有點縮皮感覺，抵鬧！
其實《情》已經拍得不錯，只是原著記憶太深、太好，容易拿來作比較，亦奉勸各位欣賞《情》時，不要理會情節合理與否，若太過以理性角度欣賞，實難體會此片味道，而最後開心結局總比傷感結局來得好，《情》片仍值得買回家一煲！