咁多代《龍珠》遊戲，每次有孫悟空出現，龜波氣功都自自然然成為必備招數，今次喺至潮任天堂新主機Wii推出嘅《龍珠ZBudokaiTenkaichi2》，更要盡情利用佢個體感手掣WiiRemote「手動出招」，記得睇住悟空教你點出波！
記者：許福合
攝影：何家亮
ImageGirl：Fion
體感手掣出波殺敵
《龍珠ZBudokaiTenkaichi2》憑住體感手掣，有另一番唔同效果，遊戲需要用NunChuk配合使用，同以往龍珠遊戲一樣，唔同角色都會有唔同招式，若使用孫悟空，只要控住Z同B掣，再好似卡通一樣做番龜波氣功動作，就可以出波！另外擋格、氣功波都係以動作來出招，基本拳腳可直接㩒掣。Wii體感感應做得幾好，之前試《WiiSports》已經覺OK，不過《龍珠》出招所需要感應比《WiiSports》更大，只要唔係走太遠，動作都可以正常Feel到。
真人示範出招
動作1 飛行
㩒住C掣，將NunChuk拉高即係跳，拉兩次係飛起，而飛行中舉上放下就可控制向上或下飛行。
動作2 擋格
戰鬥時要使出擋格動作，可以用傳統方式，十字掣上下掣使用，想動感啲就可將WiiRemote舉高向上，Pointer離開屏幕範圍，就可抵擋對方攻擊。
動作3 氣功波
出波係《龍珠》攻擊招數之中，最常用嘅一種，使用方法好簡單，按下Z掣，再將NunChuk上下搖動，成功的話就會向面前發出氣功波。
3D畫面似動畫
遊戲中將會見到多集遊戲或動畫所出現過嘅角色，包埋變身共有120種以上，遊戲以3D動作進行，視覺畫面就同睇緊動畫無分別，場景有地球同外太空星球，更可飛天下水，又會加插多段CG同角色間對話，部份對答更似曾於動畫內出現，Fans睇落份外投入！
遊戲仲有盃賽式格鬥錦標賽、自由對戰，唔好忘記仲有個商店模式，使用遊戲內賺取金錢購買道具來強化角色能力。
試玩後感：比PS2更逼真
係《龍珠》嘅Fans，一定集集捧場，不過PS2出嗰幾集都玩到悶啦，角色設計又唔係特別索，又唔似得《DOA》咁一邊打機一邊有靚女睇。不過Wii今次出嘅《龍珠》，操控方法就好唔同。
聽到Wii之名，興趣當堂返晒嚟，兩眼放光，因為玩得Wii玩手掣，應該唔會好似舊版咁，㩒住個十字掣打到爆機啩！
Wii版《龍珠》真係突破晒以往傳統，只要一手Wii嘅RemoteNunChuk跟住畫面中悟空做出相同動作，就可以出招，好似佢招成名技龜波氣功，應該無邊個唔識出喇啩，只要角色有足夠氣，動作無錯就可以發出氣功波，真係史上最真實嘅《龍珠》遊戲。
不過記得咪學埋悟空大叫「龜波氣功！」，唔係就失禮。
試玩時，唔經唔覺，原來後面企咗一大班人……
Profile
主機：Wii
廠商：BANDAINAMCO
類型：動作
遊戲人數：1-2人
售價：$380
銷售點：I-Gamer
地址：深水埗福仁商場地下G16舖
電話：27253338