【本報訊】元朗朗日路一間大酒樓昨晚舉行婚宴，親友向新郎灌酒，惹起戥穿石不滿，有人竟「響朵」及吹雞班馬，召來逾50名「兄弟」趕至向親友報復，邊個隊酒打邊個，一時間酒樓頓成戰場，異常混亂，至少有數名男親友受傷，警方接報到場時，逞兇者已告散去，警方正追緝涉案「兄弟」及將三名傷者送院。
現場為元朗朗日路西鐵站二樓的囍慶大酒樓，昨晚有劉府迎親在上址擺酒宴客，筵開20多席。據悉，劉府主人家是圍村人，宴請親友主要是男家親友，至晚上近11時尾聲，杯盤狼藉，不少親友亦飲到面紅耳熱。
「想隊冧我？我係勝和嘅！」
其中有數名親友玩新郎，挑戰新郎哥，惟一班戥穿石在場擋駕，雙方愈飲愈烈，一班戥穿石亦飲至醉醺醺，有人疑酒後口出狂言：「想隊冧我？我係勝和嘅！你哋要……」
雙方遂起爭執，結果有人致電吹雞班馬，未幾，50有多名「兄弟」趕至現場，面對敵意灌酒的數名親友非常不滿，一言不合下大打出手，在拳頭和酒杯亂掟下，場面異常混亂，職員勸止無效報案。警方到場後，發現逞兇者已散去，救護員於是將傷者送院治理。