年尾將至，又係時候選啲乜乜年度人物，假如選2006年ManoftheYear或者最勇敢的中國人，應該唔使投票，因為繼續做8號仔話事人嘅李澤楷，肯定實至名歸。由6月叫賣8號仔，唔計期間的風風雨雨，淨係佢話唔理中方反對都要為小股東利益搏到盡，到佢話唔like阿爹插手兼感到regret，再寧願賣唔成，淨係呢幾吓都型到爆，嗰種反叛同豁出去，雖然令班長輩好頭痕，但就令佢繼續成為後生一脫嘅偶像！
留意報紙Headline
根據口痕友講，貴為亞洲第一鑽石王老五，加埋個樣都掂，李家二少一向好緊張自己形象，呢半年來單deal令佢做咗N次報紙A1頭條，咁成日見報嘅佢最緊張係乜呢？第一，係佢自己個「嘜頭」，第二就係報紙條Headline！一路以來，大家都以為呢個番書仔唔識中文，其實佢唔止識睇晒啲中文報道，更加明白人哋有冇響字裏行間暗寸佢！
唔鍾意「小小超」花名
至於報紙登啲相呢，據聞如果出得唔靚，佢仲介意過條Headline寫得衰。口痕友話，當年8號仔第一代公關，就處理過唔少二少嘅呢啲投訴，後尾8號仔耐唔耐發吓二少啲官方靚仔相畀傳媒，等大家開心唔使煩。
另一樣二少介意嘅，就係「小小超」呢個跟咗佢好耐嘅花名！消息人士話，喺比較「有為」嗰班富豪第二代裏面，個個都努力咁擺脫上一代嘅影子，其中尤以二少最努力，除咗建立自己事業，就連個花名佢都希望唔好同爸爸扯上關係，但冇計，超人影子實在太巨大，恐怕除非脫離父子關係，否則二少唔使旨意搣甩呢個花名！查實改乜鬼花名呢，佢最鍾意人哋叫佢Richard，因為夠親切，叫乜鬼「小小超」吖！
話時話，二少單世紀deal叫做閉咗幕，大家都關心佢點去收拾殘局，買《信報》又俾人將軍話犯規，網通張春江又代阿爺話要「觀察」佢。唉，唔知二少幾時先至會冇咁惹火，等大家可以休息吓呢？